Rede nicht garstig

Bist du ein Christ' vnd bist aus Gott geboren/
So rede nicht/ was ehrbarkeit vnd zucht
Zu wieder ist/ der ist von Gott verflucht/
Der vnzucht liebt/ vnd letzet züchtig' ohren.
Ein fauler mund der ehrbarkeit verschworen
Der ist vnd bleibt in seinem wust verrucht/
Der aber ehr' aus zucht durch ehren sucht/
Der redet nichts/ er wegt es denn zuvoren.
Drumb liebst du zucht/ so sey darauf bedacht/
Daß nicht dein mund/ den näh'sten ärger macht/
Die jugend wird auch durch ein wort verführet.
Vnd weil dein hertz' ein tempel Gottes ist
So sey der mund/ der dessen thor/ von mist
Der vnzucht rein/ gleich wie sich das gebüret.

Johannes Plavius
Aus der Sammlung Sonette